Nagpahanumdom ang kapulisan sa banwa sang Pontevedra nga indi gilayon mag-panic kag mangin vigilant sa mga impormasyon nga nagalapta, kasunod sang threat ukon pamahog nga natabo sa Capiz National High School sang nagligad nga mga adlaw.
Sa interview sang Bombo Radyo kay Police Captain Ma. Fe Umiten, hepe sang Pontevedra Municipal Police Station, iya ginpahayag nga importante nga i-verify anay ang impormasyon kag usisaon ang ginhalinan sini antes magpati ukon magpalapta.
Suno kay Umiten, ang pagpalapta sang fake news mahimo magtuga sang kakulba kag kahadlok sa publiko, gani ginapanawagan niya ang tanan nga mangin responsable sa pag-share sang impormasyon.
Dugang pa sini, ginhugtan sang kapulisan ang mga precautionary measures sa banwa paagi sa pagdugang sang police visibility kag security assistance sa mga eskwelahan.
Padayon man ang koordinasyon sang kapulisan sa mga buluthuan agud masiguro ang seguridad sang mga estudyante, manunudlo kag iban pa nga personnel.
