Ginkilala ang maayo nga performance, dedikasyon kag pagserbisyo sang Pontevedra Municipal Police Station matapos ini nga nakabaton sang Gold Eagle Award sa Performance Governance System (PGS) Proficiency Stage.
Sa interview sang Bombo Radyo kay Police Captain Maria Fe T. Umiten, Officer-in-Charge sang Pontevedra Municipal Police Station, iya ginpahayag nga isa ka daku nga kadungganan kag accomplishment para sa ila estasyon ang pagkabaton sang nasambit nga pagkilala.
Suno kay Umiten, ang award isa ka pamatuod sang padayon nga commitment sang ila estasyon sa pagpatuman sang PNP PATROL Plan agud mangin mas epektibo, responsable kag masaligan ang serbisyo sang kapulisan.
Pahayag pa niya, nangin daku nga kontribusyon sa paglab-ot sang sini nga award ang padayon nga pagpatuman sang police visibility, anti-criminality operations, intelligence-driven operations, implementation sang warrant of arrest, checkpoints kag crime prevention campaigns.
Dugang pa sang natungdan, ginpabaskog man sang ila estasyon ang community engagement paagi sa mga information dissemination, school-based activities, barangay visitations, pag-atender sa barangay assemblies kag koordinasyon sa Local Government Unit, Municipal Advisory Group kag iban pa nga stakeholders.
