ROXAS CITY – Tatlo na ka adlaw nga may nababaton nga report ang Pontevedra PNP sang gina-alegar nga may nagapatigayon sang tumbo kag dako ang tay-anay sa isa ka namatyan kag ginapahayag nga may yara na sang nagapangayaw nga mga indibidwal gikan sa iban nga banwa.
Ini ang ginpahayag ni PMaj. Cyril Punzalan sang ma-interview sang Bombo Radyo.
Ginpahayag ni Punzalan, nga ila ini gin-validate sa bulig sang Provincial Intelligence Unit (PIU) kag didto na kumpirmar nga positibo nga may yara sang nasambit nga pahampang sa amo nga namatyan.
Mahibaluan nga apat ka mga persona ang nagkaladakpan matapos nga nagapatigayon sang Cara y Cruz ukon Tumbo sa Barangay Hipona, Pontevedra, Capiz.
Matandaan nga ginkilala ang mga ini nga sanday Jaywellard Dela Cruz, 19 anyos nga residente sang nasambit nga lugar; Rey Bacanto, 45 anyos sang Barangay Lantangan; Jessie Deseo, 45 anyos sang Barangay Poblacion, President Roxas kag Donie Dichosa, 47 anyos sang Barangay Poblacion, Pilar, Capiz.
Nakuha sa mga nagkaladakpan ang (3) ka bilog nga sensilyo nga ginagamit bilang paraphernalia sa pagsugal, P2,321 nga bet money, kag lamesa.
Base sa ila validated information nga may yara sang nagabangka nga nagdala sang tumbuan kag dalagko ang tay-anay sa bilasyunan sang mga nagasugal.
Gin-athag man ni Punzalan nga wala nila ini gilayon na-aksyunan bangud masako ang ila imbistigador sang tion nga nabaton nila ang report.
Apang, nagapasalamat ini sa mga residente nga nagpalab-ot sang amo nga reklamo kag ilabi na sa PIU sa pagpamuno ni PLTCOL Francisco Paguia nga nangin positibo ang ila operasyon.
