PONTEVEDRA, CAPIZ – Ginkumpirma sang hepe sang Pontevedra PNP nga may apat sila ka mga witnesses sa pagpasaka sang kaso nga 2 counts of murder sa suspek nga si Sultan Oquendo nga nagluthang-patay sa mag-asawa nga Noli kag Juara Navarro sa Barangay Hipona, Pontevedra, Capiz.
Ginpahayag ni Police Major Christopher Candelario nga nag-execute sang ila sworn statement ang apat ka mga testigo nga nagatudlo sa anak ni Kapitan Resty Oquendo nga responsable sa kamatayon sang mag-asawa nga Navarro.
Padayon sa gihapon ang hot pursuit operation sang kapulisan kag mas ginpasangkad pa sang operating team ang ila pagpangita sa suspek sa diin nasulod na sang hubon ang Northern Iloilo matapos nakabaton sang impormasyon sang sightings ni Sultan, apang wala sang kun anuman nga traces sang presensiya sang suspek.
Apang aminado si Candelario nga matapos nagpaguha na sang reward sa sin-o makatudlo sa ginapanaguan ni Oquendo, may pila na sila ka mga impormasyon nga nabaton, sa diin wala sila sang ginausik nga oras kag ila ginapadulungan ang lugar.
Positibo ang ginatudlo nga lugar sang mga informants, apang bangud moving ang suspek, wala ini maabtan sang mga kapulisan.
May ginpahamtang man nga mobile patrol sa Barangay Hipona kasunod sang request sang pamilya sang mga biktima.
Subongman padayon ang ila monitoring kag ginpasagkad pa ang intelligence gatherings sa barangay.
Samtang nahibaluan nga maka-apat ka beses nga na-estorya ni Major Candelario si kapitan Oquendo nga nagpasalig nga pananglitan mahibaluan ang ginapahamtangan sang anak, siya mismo ang magadala kay Sultan sa Pontevedra PNP para boluntaryo nga magsungka.
Samtang wala man ginadula ni Candelario ang posibilidad nga indi madakpan si Sultan bangud may mga tinawo ang pamilya Oquendo nga naga-kontak sa iya kag nagasugid kun diin nga lugar ang operating team. Ginpasalig ni Candelario kay Sultan kag sa pamilya Oquendo ang safety sang suspek sa Pontevedra PNP pananglitan nga magsungka ini sa mga kapulisan.
