ROXAS CITY – Nagpaathag ang pamunuan sang Pontevedra Municipal Police Station natuhoy sa ila nga pag-release sa ginatudlo nga suspek sa pagluthang-patay sa mag-utod sa isa ka binaylihan sa Sitio Rosario, Barangay Lantangan, Pontevedra, Capiz.
Matandaan nga dead on the spot ang isa sa mga biktima nga si Felome Bangud, 42 anyos samtang ginbawian naman sang kabuhi samtang ginabulong sa ospital ang manghod sini nga si Melfer Bangud, 34 anyos kun sa diin ginatudlos nga suspek amo si Barangay Kagawad Joseph Manican.
Suno sa imbestigador sang Pontevedra PNP nga si Police Staff Sergeant Rea Batuigas, gin-release si Manican matapos ang 36 oras nga reglementary period of detention matapos nga wala matigayon nga mapasaka ang kaso batuk diri.
Ini bangud Biyernes sang gab-i natabo ang krimen kag naaresto si Manican rason nga wala may maka-release sang death certificate kag post-mortem examination results sang Sabado kag Dominggo nga adlaw nga amo ang rekisitos agud mapasaka ang kaso sa piskalya.
Suno diri nga matapos ang 36 oras nga reglementary period of detention, kinahanglan nila nga i-release si Manican agud bangud kun indi, mahimo sila mapasakaan sang reklamo nga arbitrary detention.
Apang sa karon nahitsu na sang Pontevedra PNP ang tanan nga rekisitos kag pagadal-on na ini sa Office of the Provincial Prosecutor agud mapasakaan sang kaso ang suspek.
