Nag-istoryahanay sa telepono si US President Joe Biden kag Pope Francis.
Suno sa White House, gintalakay sang duwa ang pagpalapnag sang kalinong subong nga Holiday season.
Ginpasalamatan naman ni Biden ang Santo Papa bangud sa padayon ang adbokasya sini para mabuhinan ang kabudlay sa bug-os nga kalibutan.
Kalakip na ang pagpanikasog sang Santo Papa para iduso ang tawhanon nga kinamatarong kag protektahan ang religious freedoms.
Ginbaton man ni Biden ang imbitasyon sang Santo Papa nga magpadulong sa Roma sa palaabuton nga Enero 9 tubtob 12.
Samtang sa Rome makaangkon man sang separado nga pakighinun-anon ang US President kanday Italian President Sergio Mattarella kag Italian Prime Minister Giorgia Meloni.
Ini na ang mahimo ulihi nga kahigayunan nga magkitaay sanday Pope Francis kag Biden bilang Presidente sang US bangud nakatalana nga magtakop ang termino sini sa Enero 20 kun sa diin pagabuslan ini ni US President elect Donald Trump.
