Ginkumpirma ni Ukrainian President Volodymyr Zelensky nga nag-istoryahanany sila ni Pope Leo XIV sang Biyernes, Abril 3, sa tunga sang bag-o nga serye sang mga pag-atake sang Russia sa iya pungsod sa pihak sang mga panawagan para sa Easter Ceasefire.
Suno kay Zelensky, samtang nagakatabo ang ila mga paghambalanay, ginbombahan liwat sang Russia ang Ukraine gamit ang ginatos ka “shahed” nga mga drone kag dinosena ka mga missile nga nag-igo sa nagkalainlain nga mga syudad kag mga komunidad.
Dugang pa ni Zelensky nga nagapadayon ang mga pag-atake halin sang Huwebes sang gab-i kag nakalab-ot na sa indi magnubo sa lima ka rehiyon. Wala pa suno sa iya bisan isa ka oras nga kalinong ang ila pumuluyo.
Ginakabig ini nga sabat sang Russia sa panugda sang Ukraine para sa isa ka Easter ceasefire, apang sa baylo nga mag-untat, labi pa nga nagbaskog ang opensiba.
Ginhatagan man pagtamod sang Presidente sang Ukraine nga indi dapat pagbalewalaon ini nga sitwasyon, kag nagpabutyag sang pagpasalamat sa mga pungsod nga padayon nga nagahambal kag nagapakamalaut sang kalakasan.
Sa tion sang pag-istoryahanay, gin-istoryahan man ang nagapadayon nga negosasyon, lakip na ang kooperasyon sa Estados Unidos sang Amerika.
Ang Ukraine nagpabutyag man sang pagpasalamat sa bulig sang Vatican, ilabi na sa pagbalik sang mga gin-kidnap nga kabataan kag sa humanitarian aid nga ginhatag, ilabi na sang nagligad nga tigtulugnaw.
Gintalakay man ang sitwasyon sa Middle East kag sa Gulf Region.
Sa katapusan sang ila paghambalanay, ang Presidente sang Ukraine nagpalab-ot sang mga panamyaw sa Santo Papa kag sa tanan nga nagasaulog sang Easter subong nga Domingo, upod ang pangamuyo para sa paghidait.
Ang Ukraine nagpabutyag man sang iya kahanda sa pagbaton sa Santo Papa kon magbisita siya sa Ukraine.
