LOURDES, France-Nagsaad si Pope Leo XIV nga palig-onon ang mga tikang sang Simbahang Katolika agud maprotektahan ang mga biktima sang clerical sexual abuse kag malikawan ang pagbalik ukon pagdugang sang amo nga mga pag-abuso.
Ginhimo ni Pope Leo ang iya pahayag matapos niya pribado nga ginkita ang pito ka mga biktima sang sexual abuse sang mga pari sa Lourdes, France, bilang kabahin sang iya apat ka adlaw nga opisyal nga pagbisita sa pungsod.
Ang mga biktima, nga mga adulto na subong, nagpakigkita sa Santo Papa sa tion nga ginapahayag niya ang iya commitment nga ipadayon ang mga reporma sang Simbahan bilang sabat sa nagligad nga global nga eskandalo sang clerical sexual abuse.
Lakip sa nakigkita kay Pope Leo ang 80-anyos nga si Jean-Marie Delbos, nga nagsiling nga “extraordinary” ang iya eksperyensya sa pagpakigkita sa Santo Papa. Suno sa mga report, gin-abuso si Delbos sang isa siya ka estudyante sa Notre-Dame de Betharram boarding school sa Lourdes.
Ang mga staff sang amo nga boarding school gin-akusahan sang physical kag sexual abuse nga nagluntad sa sulod sang pila ka dekada.
Sa iya pagpakigkita sa mga biktima, ginpahayag ni Pope Leo ang iya suporta sa ila kag ang commitment sang Simbahan nga palig-onon pa ang mga safeguards kag reporma para maprotektahan ang mga kabataan kag malikawan ang dugang nga pag-abuso.
Amo ini ang una nga opisyal nga papal visit sa France sa halos duha ka dekada.
