ROXAS CITY-Gindagsa sa guihapon sang madamo nga mga tumalan-aw ang una nga gab-e sa pagbukas sang tuigan nga Christmas Village sa banwa sang Panay sa pihak sang pagpamahog sang COVID-19.
Ang mga nagbisita ang nagikan pa sa iban nga mga kabanwahanan nga nagpadulong sa amo nga banwa agud personal nga masaksiha ang mga christmas lights.
Sa interview sang Bombo Radyo sa kay Gina, residente sang banwa sang Panitan, ginpahayag sini nga sa pihak nga nagbubu ang ulan, wala ini nag-upang sa iya agud magpadulong sa amo nga Christmas Village.
Suno pa sa ginang nga first time pa lamang sini nga makakadto kag makita personal ang madinuagon nga mga lights.//
Dugang pa sini nga madugay na sini nga luyag makita ang amo nga talan-awon.
Samtang ginpasalig naman sang mga kapulisan nga hugot ang ila nga pagpatuman sang mga minimum health protocols sa mga nagabisita sa lugar.
Suno sa hepe sang Panay Municipal Police Station nga si Police Captain Christian Mahometano nga hugot nga ginapatuman sa mga nagabisita ang pagsuksuk sang facemask kag pag-obserbar sang physical distancing agud malikawan ang paglapta sang COVID-19.//
Magluwas diri, ginadumilian man ang park sang mga salakyan kag pagbaligya sa atubangan sang amo nga lugar.
Gindugang pa sini nga tubtob gid lamang alas 9 sa gabe ang pagbisita sa Village kasunod sang ginapatuman nga curfew hour sa probinsiya
Talalupangdon man ang kagamay sang mga nagpadulong sa opening kumpara sang tinalikdan nga tuig bangud sang pandemiya.
Mahibaluan nga ang Panay Christmas Village ang bukas tubtob sa Enero 6, 2021 nga may yara sang kabug-osan nga pondo nga nagalab-ut sa P700,000.
