ROXAS CITY – Dismayado ang mga pumuluyo sang Barangay Lanot, sining syudad partikular ang mga residente nga naga-estar sa nalikod nga bahin sang Provincial Environment and Natural Resources Office (PENRO) matapos nga ginpaderan ang porsyon sang dalan nga gina-agihan sang mga pumuluyo.
Ginpahayag ni Armando Agustin sang Barangay Lanot nga gin-extend sang talatapan ang pagpahamtang sang pader kag ginhatagan lamang sang dos metros nga alagyan ukon road right of way ang mga residente nga naga-estar sa likod sang PENRO office.
Apang natukiban nga ang ginareklamo ni Agustin nga alagyan nga ginhatag sang nasambit nga talatapan ang indi na sakup sang duta sang PENRO kag ginapanag-iyahan ini sang pribado nga indibidwal.
Nabalaka ang tagreklamo nga may posibilidad nga mapasataduhan ang ila ginaagyan kag kun matabo ini, apektado ang mga pumuluyo bangud wala na sang sarng maagyan.
Nagpahayag pa sang pagkadisgusto si Agustin, bangud wala sila gin-impormar sang PENRO sang ila ginpaderan ang area nga sakup sang talatapan.
