ROXAS CITY – Dako nga bulig sa pamilya ilabi na nga may yara sang estudyante nga ginapa-eskwela.
Ini ang ginpahayag ni nanay Nona San Agustin Parent lider sang 4Ps sa Barangay Banica, Roxas City, sang ma-interview sang Bombo Radyo.
Suno kay Nanay Nona, tuman ang iya kalipay sang nahibaluan nga posible madugangan ang benepisyo nga ila nabaton bilang 4Ps member bangud ang subong nga ila nababaton kada bulan indi bastante sa ila ilabi na sa iya bata nga estudyante.
Ang 4Ps, isa ka stratehiya sang gobyerno sa pagpanubo sang kapigaduhon samtang nagaganar ang publiko.
Sa idalum sini, ginahatagan sang benepisyo ang mga miyembro sa tion nga nagasunod ang ma ini sa pagsulundan kaangay sang pagpa-eskwela sang ila mga kabataan sa eskwelahan, pagpacheck-up sa helth centers kag pagtambong sa kada bulan nga family development sessions.
Ginpahayag man ni Nanay Nona nga sa sulod sang 10 ka tuig na niya bilang miyembro sang 4Ps napatapos sini ang iya duha ka kabataan kung sa diin nagatrabaho na sa karun.
Mahibaluan nga nagabaton ini sang P3,300 kada bulan nga benepisyo nagikan sa gobyerno.
