Ginpahayag ni Senador Erwin Tulfo nga ginatun-an sang ila grupo upod sa mga senador nga kaalyado ni Senador Sherwin Gatchalian ang posible nga salabton sang mga nagapanguna sa ginapaabot nga Blue Ribbon Committee hearing, bangud posible nga may nalapas ini nga kaso sang usurpation of authority ukon iligal nga pag-angkon sang poder.
Suno kay Tulfo, kon ang aktibidad isa lamang ka press conference, sakop ini sang kinamatarong sa kahilwayan ukon freedom of expression.
Apang ginpamangkot sang senador ang matuod nga katuyuan sang nasambit nga pagtililipon kag ginpahayag nga posible ini nga ginagamit agud madestablisar ang gobyerno kag magpasaka sang bag-o nga mga akusasyon batok sa presidente kag iban pa nga mga opisyal.
Ginpabutyag man niya nga indi ini mahimo nga opisyal nga hearing bangud wala sang committee secretariat nga magarekord sang mga matabo.
Dugang pa niya, indi na mahimo nga pangunahan nanday Senador Pia Cayetano kag Senador Rodante Marcoleta ang Blue Ribbon Committee matapos nga ideklarar nga bakante ang tanan nga posisyon sini sang Hunyo 3.
Madumdoman nga si Tulfo ang gintalana nga chairperson sang Senate Blue Ribbon Committee matapos ang reorganisasyon sa Senado.
