Nagpabutyag si Senador Erwin Tulfo sang iya pagpamatuk sa nagalapta nga huring-huring angut sa ginaalegar plano nga pagbag-o sang liderato sa senado agud mauntat ang impeachment proceedings batok kay Vice President Sara Duterte.
Suno kay Sen.Tulfo, daku nga kahuy-anan para sa Senado kon may yara sang “kudeta” ukon hinali nga pagbag-o sang liderato sang Senado samtang pending pa ang impeachment trial.
Mabudlay suno sa iya nga ipaathag sa publiko ang anuman nga tikang nga magatuga sang pagbag-o sa liderato sang Senado kadungan sang isyu sang impeachment.
Ginpanindugan man sang senador nga indi dapat gamiton ang leadership issue agud ma-delay ukon ma-untat ang natalana nga constitutional process sang impeachment.
Ginhatagan man niya sang importansya nga dapat pahanugutan nga magpadayon ang trial agud mahatagan sang kahigayunan ang kampo ni Duterte nga masabat ang mga alegasyon batok sa iya kag agud nga magguwa ang kamatuoran pinaagi sa due process.
Nahibaluan nga subong nga adlaw natalana nga pagabotohan ang Articles of impeachment batok kay Vice President Duterte agud pormal na nga mapasaka sa Senado.
