ROXAS CITY – Ginarespeto sang militar ang kinamatarung ni Baltazar Saldo, kun magdesisyon ini nga magpasaka sang kaso.
Sa interview sang Bombo Radyo Roxas Army Captain Cenon Pancito III, tagpamaba sang 3rd Infantry Division Philippine Army, ginpahayag sini nga kinamatarung ini ni Saldo kag indi nila ini mapunggan.
Apang ginklaro sang opisyal nga nag-akto lamang sila sandig sa nabaton nga impormasyon gikan sa isa ka witness nga nagpanindugan nga si Saldo ang madugay na nga ginapangita nga anay commanding officer sang rebelde nga grupo nga may apat nga mga warrants of arrest.
Nagpanindugan man si Pancito nga nag-agi sa maidid nga intelligence monitoring ang tanan sa diin ginpahanumdum nila ang witness sang pagaatubangon nga konsekwensiya kun mapamatud-an nga ini ang nagabutig.
