Nagpabutyag sang sentimyento ang Grains Retailers’ Confederation of the Philippines (GRECON) nga wala pa sang kasiguraduhan ang ginapalapta nga posibilidad sang pagtaas sang presyo sang bugas sa bulan sang Setyembre .
Sa interview sang Bombo Radyo, kay Capiz Vice Governor James ‘Mitang’ Magbanua, president sang Grains Retailers’ Confederation of the Philippines (GRECON), iya ginpahayag nga premature pa ang pagdeklarar nga posible maglab-ot sa P62 pesos kada kilo ang presyo sang bugas, bangud mahimo lamang ini maghatag sang kahadlok sa publiko.
Suno kay Magbanua, mas maayo nga sa baylo sang pagpalapta sang espekulasyon, dapat magtutok na lang sa pagpangita sang mga solusyon agud mapugngan ang pagtaas sang presyo sang bugas.
Pahayag pa niya, aminado ini nga may pagtaas sapresyo sang bugas sa merkado, apang posible man ini nga magnubo bangud may mga lugar nga nagasugod na sang third cropping harvest kag madamo man sang imported rice nga nagaabot sa pungsod.
Dugang pa sini, lakip sa mga ginatan-aw nga rason sang posible nga pagsaka sang presyo amo ang pagka-delay sang pagtanom, mataas nga presyo sang abono, pagsaka sang presyo sang fuel, paghina sang piso kontra dolyar, kag pasahod sa mga mangunguma.
Matandaan nga naglapta ang espekulasyon nga posible maglab-ot sa masobra 60 pesos kada kilo ang bugas sa Setyembre bangud sang epekto sang gira sa Middle East nga amo man ang nagduso sa pagtaas sang fuel kag hauling cost, rason nga nagpadala sang sulat si Magbanua sa Department of Agriculture para sa dugang nga aksyon kag solusyon.
Naglaum naman ang opisyal nga makabaton sang “positive response” ang iya panawagan nga indi anay pagpasakaon ang presyo sang bugas kag sa baylo magpatuman sang alternatibo nga mga pamaagi.
