Ginakabig sang isa ka barangay official nga may positibo kag negatibo nga epekto ang ginapropose nga pag-postpone sang Barangay kag Sangguniang Kabataan Elections (BSKE) 2026, kasunod sang nagapadayon nga mga hagna sa Kongreso nga palawigon ang termino sang mga barangay kag SK officials.
Sa interview sang Bombo Radyo Roxas kay Earl Valencia, Barangay Kagawad sang Brgy. Baybay, Roxas City, ginpahayag sini nga “50-50” ang iya panan-aw sa isyu.
Suno sa iya, importante nga ibase ang desisyon sa pulso sang pumuluyo kag indi lamang sa mga politiko.
Ginpakigbahin sini nga may positibo man nga epekto kon ma-postpone ang eleksyon bangud ,makahatag ini sang dugang nga tion sa mga incumbent officials agud matapos ang ila mga nagapadayon nga proyekto.
Sa pihak nga bahin, ginpabutyag ni Valencia nga may negatibo man nga epekto ang postponement sa demokrasya. Suno sa iya, may mga barangay officials nga wala na nagapakita sang aktibo nga pagserbisyo kag gusto na sang mga residente nga maislan sila pinaagi sa eleksyon.
Dugang pa sang natungdan, pili-on ang mga kandidato nga may matuod nga dedikasyon sa pagserbisyo kag may napamatud-an nga trabaho sa barangay.
