ROXAS CITY – Hugot nga ginadumulian sang Provincial Veterinarian Office ang pagsulod sang mga poultry products nagikan sa Luzon kag Mindanao bangud sa posible nga paglapta sang Bird Flu sa probinsya.
Ini ang ginpahayag ni Dr. Leonil Obordo, Provincial Veterenarian sang Provincial Veterinary Office sang mainterview sang Bombo Radyo.
Suno diri, nagpapanaug na sang executive order ang gobyerno probinsyal nga nagadumili sa pagsulod sang manok, itlog kag ilabi na ang balut sa mga lugar nga tuman nga apektado sang bird flu.
Mahibaluan nga nauna na nga nagpapanaug sang banning ang Aklan, Iloilo kag Antique.
Gintuad man ni Obordo nga bastante ang suplay sang manok kag itlog bangud sa madamo nga poultry raiser sa probinsya.
Samtang, may yara naman nga pagnubo sa suplay sang balut apang suno diri indi ini dapat pagkabalak-an bangud indi man indi nagapanganuna ang kinahanglanon kag ipa-iway danay ang pagkaon sini.
Ginasiguro man sini, nga padayon ang ila pagmonitor sa nasambit nga virus nga nagaapekto sa mga manok.
Ginpunto man ni Obordo nga antes makasulod ang mga poultry products sa probinsya kinahanglan sini magpakita sang nagakaigo nga requirements kag mag sunod sa ginapatuman nga mga pagsulundan kag polisiya.
Sa karon, wala pa sang napagkit nga bird flu outbreak sa bug os nga rehiyon sang Western Visayas.
