Naglab-ot na sa 6.5 million ka mga Pinoy ang nakuha gikan sa kaimulon matapos nga nagnubo ang poverty rate sang pungsod sa record-low nga 9.7% sadtong 2025 suno sa Philippine Statistics Authority (PSA).
Ini ang labing una nga kahigayunan nga nagnubo sa single digits ang poverty level nga ginakabig nga isa ka daku nga milestone bangud nalab-ot ini sang mas temprano ukon tatlo ka tuig antes ang target sang 2028 sa idalum sang Philippine Development Plan (PDP) sang gobyerno.
Base sa datos sang PSA, 11 million ka mga Pinoy ang nagakabuhi sa idalom sang poverty threshold sang nagligad nga tuig, nga nagnubo gikan sa 17.5 million sang 2023.
Ang pagnubo sang poverty rate nagasunod sa pagtaas sang nominal income sa 22% sa tunga sang 2023 kag 2025, halin sa narekord nga inflation rate nga 5% sa amo man nga panahon.
Suno kay Economic Planning Secretary Arsenio Balisacan ini ang labing una nga kahigayunan wala pa isa sa napulo ka Pinoy ang nagakabuhi sa idalom sang poverty line.
Ginsiling man niya nga ang pagkab-ot sang manubo nga lebel sang kaimulon bisan wala pa ang target sang dugang nga pagpasangkad sang mga oportunidad sa ekonomiya, upod ang epektibo nga proteksyon sosyal makahatag sang daku nga pagbag-o sa kabuhi sang pumuluyong Pilipino.
