ROXAS CITY – Ginkumpirma sang general manager sang Capiz Electric Cooperative (Capelco) ang pagnubo sang balayaran sa kuryente sa P1.63 sentimos per kilowatt hour sa tatlo ka magkasunod nga bulan humalin sang Agosto-Septiembre kag Oktubre.
Suno kay Engr. Edgar Diaz nga ini ang una nga bes nga natabo sa kasaysayan sang Capelco nga tatlo ka magkasunod nga mga binulan nga nagnubo ang balayaran nga nabatyagan sang mga member-consumers.
Nakabulig para magnubo ang bili sang kuryente amo ang generation charge sa diin kasunod ini sang pagnubo sang cost of production sang power supplier bangud sa manubo nga demand kag ang systems loss charge.
Nagalaum si Diaz nga ma-mentenar sang Capelco ang cost of production agud mangin tayuyon ang pagnubo sang balayaran sang kuryente
Samtang daku ang mabulig sang kooperasyon sang mga member-consumer para padayon nga ma-enjoy ang manubo nga bili sang kuryente.
Nag-apelar man si Diaz nga likawan ang paggamit sang kuryente sa tagsa ka peak hour kasubong las 6 sa gab-I tobtob las 10 sa gab-i.
