Bangud sa posible nga pagdamo sang mga kargamento nga ginapadala kada holiday season, ginpanugyanan sang Philippine Ports Authority ang publiko nga timpranuhon ang pagpadala sang mga balikbayan box subong nga paskwa kag New Year.
Sa nangin pahayag ni PPA General Manager Jay Santiago, ginpahayag sini nga mas madugay ang pag-abot sang mga ginapadala nga kargamento kada holiday rush.
Suno pa kay Santiago nga kinaandan nga nagalab-ot lamang sang 45 days antes mabaton ang isa ka balikbayan box apang bangud sa holiday rush, mahimo nga magalab-ot pa ini sa bulan sang Pebrero sa masunod nga tuig.
Ginpahanumduman man ni Santiago ang publiko nga suportahan lamang ang mga lehitimo nga freight forwarders agud maayo ang pagbaton sang mga himata ang mga padala nga kargamento.
Agud mangin madasig ang proseso, mas maayo nga likawan ang pagpadala sang mga ginabawal nga gamit.
