ROXAS CITY – Aminado ang pamunuan sang Philippine Red Cross (PRC) Capiz Chapter nga nahangawa sila sa mangin sustainability sang suplay sang dugo sang talatapan bangud sang coronavirus disease (COVID-19) pandemic.
Ini ang ginpahayag ni Donor Recruitment Officer Ketch Armiza sang mainterview sang Bombo Radyo.
Suno kay Armiza, sa karon nagapabilin pa nga normal ang suplay sang dugo sa probinsiya apang ang ila gina-problemahan kun maka-sustenir ini sa masunod nga mga inadlaw ukon binulan.
Ginpahayag sini nga bangud sang COVID-19 pandemic, halos 17 ka mga blood donation activities nila ang nakanselar.
Ginpahayag ni Armiza nga kun wala sila sang tayuyon nga blood donation activities, maga-iban lamang ang suplay nila sang dugo apang wala gid sang magadugang.
Bangud diri suno kay Armiza, nagapanawagan sila sa publiko ilabi na sa mga luyag mag-donar sang dugo nga bukas ang ila talatapan para sa blood donation.
Magapakig-angut man ang pamunuan sang PRC-Capiz Chapter sa gobernador sang probinsiya nga kun mahimo makonsiderar kag pasudlon sa border control checkpoints ang mga indibidwal nga magapadulong sa ila talatapan kag luyag magdonar sang ila nga dugo.
