ROXAS CITY – Indi na maghawid sang kapin P10 milyon nga pondo ang Philippine Red Cross para kuntani sa procurement sang relief goods nga igapanagtag sa mga naapektuhan sang bagyong Agaton.
Ini ang ginkumpirmar ni Mr. Raymundo Martinez, pinuno sang Philippine Red Cross-Capiz Chapter sang ini ang mapakig-angutan sang Bombo Radyo.
Ginpahayag ni Martinez, nga pila ka adlaw ang nakaligad matapos nga nakahiwat na sang special session ang Sangguniang Panlalawigan, nakabaton siya sang draft nga Memorandum of Agreement (MOA) gikan sa provincial government kag may lakip nga sulat nagikan kay Gobernador Esteban Evan Contreras nga nagapaabot sang pagpangabay nga batunon sang nasambit nga ahensya ang pondo nga ila gin-alokar para sa mga apektado sang pagbaha tuga sang nasambit nga bagyo.
Matandaan, sa Comelec resolution 10747 nakasaad diri nga sa tion sang banning period ginabawal ang mga Local Government Unit (LGU) nga maka-disburse sang pondo para sa relief distribution kun may yara sang kalamidad.
Nakasaad man sa nasambit nga resolusyon nga igaturn-over sa Philippine Red Cross ang pondo nga kapin P10 milyon pinaagi man sa guidelines nga ginpaguwa sang Commission on Audit (COA) kag may supervision man sang Comelec.
Suno kay Martinez, pagkatapos nila nga mabaton ang MOA gilayon nila ini nga gin-forward sa ila nga national headquarters agud mapa-aprubahan kay Mrs. Elizabeth S. Zavalla ang secretary general sang PRC.
Madasig man suno diri nga nagpadala sang response si Zavalla nga naka-address kay Gov Contreras, kun sa diin ginkumpirmar kag gin-athag sini ang role sang PRC nga ang ila lang masarangan amu ang validation kag registration sang mga benepisyaryo kag wala na diri nadala ang procurement sang relief items.
Dugang sini, nga pagahulaton nalang nga matapos ang banning period kun sa diin asta lang ini sa Mayo 8, kag ang provincial government na mismo ang magaprocess sini.
Nagpasalig man ang PRC nga luyag sila magbulig sa provincial government unit sa distribution sang relief goods kag validation sa mga benepisyaryo.
