Nagpadala ang Philippine Red Cross sang grupo para mag-alalay sa nagadamo nga pasyente nga may kaso sang leptospirosis sa National Kidney and Transplant Institute (NKTI).
Sang tinalikdan lang nga adlaw sang Biyernes, una na nga ginbalita nga napuno ang capacity sang NKTI bangud sa paglobo sang mga pasyente. 67 sa pasiyente ang nairekord nga kumpirmado sa sakit nga leptospirosis samtang 48 naman ang naka-confine.
Gilayon naman nga nagsabat ang Red Cross kag nagpadala sang 15 medical personnel para sumuporta bangud sa kakulangan sa staff sang nasambit nga medical center.
Suno kay PRC, Chairman kag Chief Executive Officer, Richard Gordon, ginasiguro sini nga nakahanda ang PRC nga magpahamtang sang mga medical tent nga may mga hospital bed kun magtaas pa ang numero sang mga pasyente.
Samtang, dugang pa sa mga may kaso sang leptospirosis, nagapabulong man sa ospital ang iba pa nga mga pasyente nga nagapaidalom sa operasyon kag nagaka-eksperyensya sang iban pa nga balatian.
