MANILA, Philippines – Ginpalig-on ni President Ferdinand Marcos Jr., ang strategic ties sang pungsod Pilipinas kag Japan sa ginpatigayon nga courtesy call ni Hon. Fujita Fumitake, nga miyembro sa Japan’s House of Representatives kag co-representative sang Japan Innovation Party.
Sa meeting sa Malacañang, ginpahayag ni Pres. Marcos Jr. nga nagadamo ang engagement sa tunga sang Pilipinas kag Japan.
Kadungan sa pagbisita ang pagdumdom sang ika-70 nga anibersaryo sang Pilipinas kag Japan sang normalisasyon sang diplomatiko nga relasyon kag ika-15 nga anibersaryo sang ila Strengthened Strategic Partnership, nga gin-umpisahan sang tuig 2011.
Suno sa Presidential Communications Office “PCO”, padayon nga isa ang Japan sa pinakaimportante nga economic partners sang Pilipinas.
Dugang pa sa nahibaluan nga sang tuig 2025, nangin ikaduha nga pinakadaku nga trading partner sang Pilipinas ang Japan, nga may kabug-osan nga bilateral trade nga naglab-ot sa USD 22.2 bilyon.
Sa karon nangin ikaduha man nga pinakamadaku nga export market sang Pilipinas ang Japan nga nagabalor sang USD 11.57B, samtang ikatatlo naman ini nga pinakadaku nga source sang imports nga naglab-ot sa USD 10.63B.
