ROXAS CITY – Gin-athag ni Pres. Roxas Mayor Receliste Tanoy Escolin nga wala sini ginsinggitan si Barangay Kagawad Eduardo Dolor sa Barangay Poblacion, Pres. Roxas, Capiz.
Sa interview sang Bombo Radyo kay Escolin nga wala sang kamatuoran ang alegasyon ni Dolor bangud samtang nagalibot ini sa merkado sakay sa isa ka pick-up nga salakyan nga may dala nga apat ka mga trumpa ginaalegar nga siya pa ginsinggitan sang amo nga kagawad.
Suno kay Escolin nga naglibot ini sa amo nga lugar agud mahatagan sang ihibalo ang mga tawo sa Swa A,B,C, D kun sa diin ginapahog nila ang mga wala nagabayad sang ila ginarentahan nga duta.
Ginpahayag ni Escolin nga ginhambalan sini ang mga tawo nga ipa-blotter ang mga nagapanukot nga may yara sang dala nga pagpamahog nga pahalinon sila sa amo nga lugar.
Ini bangud wala man sang mga nagakaigo nga mga dokumento ukon resibo ang nagapanukot sa ila.
Magluwas pa diri, nga indi official receipt ukon ang ginahatag sa ila kun sa diin may posibilidad nga ini pagbatunon sang korte nga pamatuod nga sila ang nakabayad na.
Dugang pa sini nga nagpagkig-angut ini sa Philippine National Police agud nga mag-assist sa mga pumuluyo nga magapa-blotter.
Ginkompirmar sini nga luyag niya lamang nga proteksyunan kag pangapinan ang mga residente sang iya banwa.
Apang, nakibot na lamang ini sang ginsinggitan siya ni Dolor kun sa diin nagabantay ini sang tricycle sa likod nga porsyon sang ila salakyan kag madamo na sang mga ginhambal nga malain nga tinaga batuk sa amo nga alkalde rason nga ginpaathagan man ini ni Escolin.
Ginklaro man ni Escolin nga wala siya nagpangmulay kag posible nga naakig lamang ang amo nga kagawad sa iya bangud bata ni Dolor ang nagapanukot sa mga tawo.
Nahibaluan nga ang nasambit nga duta ang ginapahayag ginapanag-iyahan ni anay Mayor Raymund Locsin kun sa diin kapin sa 1,000 nga mga residente ang nagapuyo sa amo nga lugar.
Matandaan nga nagpa-blotter si Dolor matapos nga ginaalegar ginsinggitan ini sang amo nga alkalde.
