ROXAS CITY – Liwat nga ginpanindugan ni President Roxas Mayor Receliste Escolin nga may yara sang Deed of Donation nga ginauyatan ang banwa sa duta nga ginapatindugan sang Rural Health Unit nga himuon bilang Municipal Quarantine Facility sang nasambit nga banwa.
Ini ang ginpahayag ni Escolin sang mainterview sang Bombo Radyo.
Liwat nga ginsabat ni Escolin ang mga alegasyon ni Punong Barangay Alfonso Golero matapos ang nagluntad nga kinagamo sa tunga nila nga duha.
Suno kay Escolin nga si Golero mismo ang nagpadulong sa Rural Health Unit kag nagmandu nga untaton ang pag-ubra sini.
Gindugang pa sang alkalde nga nagpadulong sa Police Station ang nasambit nga punong barangay agud magreklamo.
Hugot man nga ginpanginwala ni Escolin nga ginsinggitan kag gintaasan sini sang tingog si Golero.
Liwat naman nga ginpanindugan sang alkalde nga wala sang kinamatarong si Golero nga magpauntat sang proyekto bangud ang nasambit nga duta ang ginpanag-iyahan sang amo nga banwa.
Ginpanginwala man sini ang alegasyon nga ginpulihan sang iya nga body guard si Golero.
Ginpahayag sang alkalde nga ginwakli lamang si Golero sang isa sa mga bodyguard sini matapos nga indi makaagi ang heavy equipment bangud yara ini sa tunga sang dalan.
