ROXAS CITY –Gintadlong sang alkalde sang banwa sang Pres. Roxas, Capiz nga wala sang kamatuoran ang nagalapta nga mga post sa social media nga wala ini nagasunod sa mga health protocols sa Boac Cemetery.
Ini matapos nga nakita ini nga wala nagasuksok sang Personal Protective Equipment ukon PPE.
Sa interview sang Bombo Radyo kay Mayor Receliste Tanoy Escolin nga wala sang kamatuoran ang nagalapta nga mga alegasyon nga ginapatuto sa iya bangud wala ini didto sang oras nga ginlubong ang COVID-19 positive nga residente sang Barangay Aranguel sa nasambit nga banwa.
Apang, nagkadto ini sang temprano sa nasambit nga patyo agud nga i-asister ang backhoe nga amo ang magakutkot sang duta kun sa diin ilubong ang napatay nga COVID-19 positive.
Ginpahayag sini nga wala man ini nagdugay bangud matapos ang 30 minutos naghalin man ini gilayon sa amo nga patyo.
Mahibaluan nga nagkadto lamang ini sa nasambit nga patyo agud nga mapasiguro nga masunod gid sang maayo ang nagakaigo nga mga health protocols sa pagpalubong sa amo nga COVID-19 positive.
Magluwas diri, may yara man sang mga katapo sang MDRRMO, kapulisan kag RHU ang nag-asister sa paglubong sa COVID-19 casualty.
Naghinyo naman si Escolin nga kun mahimo untaton na ang mga nagapalapta sang wala sang kamatuoran nga mga alegasyon.
Bangud ginaguba lamang sini ang iya pangalan kag kasubong luyag sang iban nga ipadalom ini sa quarantine period.
Ginklaro man sini nga indi dungan ang nakuha nga mga laragway bangud ginpinsan lamang ini kun sa diin makita ang iya nga presensya kag ang paglubong sa COVID-19 positive.
Dugang pa ni Escolin nga indi man sini luyag nga malatnan sang amo nga balatian gani ginaproteksyunan sini ang kaugalingon kag ginasunod man ang mga nagakaigo nga mga pagsulundan subong nga pandemya.
Samtang, naghatag naman sang pahayag ang amo nga alkalde natuhoy sa pagpahanugot kag pagdumili sa mga tawo sa pagpakadto sa nagkalain-lain nga mga patyo sa amo nga banwa.
Suno kay Escolin nga indi pa mapat-ud subong kun ano ang mangin rekomendasyon sang National-IATF subong nga nagahilapit ang adlaw sang tigkalalag.
Apang, ginpahayag sini nga kun mahimo ipaiway na lang anay ang pagbisita sang mga pumuluyo sa patyo sa ila mga himata nga nagtaliwan na agud nga malikawan man malatnan sang amo nga virus.
Samtang, nagpanugyan naman ini sa mga residente sa nasambit nga banwa nga kun mahimo nga magsunod sa mga minimum health protocols agud indi na madugangan pa ang numero sang COVID-19 cases sa nasambit nga banwa.
