ROXAS CITY – Nagtan-ay sang 25kls nga bugas si Presidente Ferdinand “Bongbong” Marcos Jr., sa 1,000 nga mga benepisyaryo sang 4P’s sa probinsya sang Capiz kung sa diin kalakip na diri ang 679 nga mga apektado sang red tide.
Ang nasambit nga pagtagtaganay ang gintambungan nanday Capiz Governor Fredinel “Oto” Castro, Roxas City Mayor Ronnie Dadivas kaupod ang katapo sang Department of Social Welfare Development (DSWD) kag pila ka mga alkalde sa mga kabanwahan.
Sa mensahe ni PBBM, ginpahayag sini nga luyag niya personal nga ipalab-ot ang bulig nga libre nga bugas sa mga Capizeño agud makabuhin sa mga galastuon partikular na sa pagkaon.
Suno sa Presidente, bangud sini liwat nga nagbuylog ang nagkalain-lain nga mga ahensya sang gobyerno kaparehas sang Department of Agriculture (DA), Department of Social Welfare Development (DSWD), Department of Labor and Employment (DOLE), Department of Health (DOH), Technical Education and Skills Development Authority (TESDA), Commission on Higher Education (CHED), Philippine Coconut Authority, Philippine Crop Insurance Corporation kag Agricultural Training Institute agud ipalab-ot ang ila tagsa ka mga serbisyo.
Madamo man suno diri nga mga magagmay nga mangunguma ang mabuligan kag isa man ini ka tikang agud mapabaskog kag mapasanyog ang kabuhi sang tagsa ka mga Pilipino.
Samtang, nagpalab-ot man ini sang pagpasalamat sa gobyerno probinsyal sang Capiz sa maayo kag mainit nga pagbaton sa iya.
