Gin-anunsyo ni President Ferdinand “Bongbong” Marcos Jr. ang gilayon nga pagpanagtag sang cash assistance kag fuel subsidies para sa mga public utility vehicle drivers, mangunguma kag manugpangisda agud mapahagan-hagan ang epekto sang padayon nga pagsaka sang presyo sang gatong.
Suno kay Marcos, magapanagtag subong nga adlaw ang Department of Social Welfare and Development (DSWD) sang P5,000 nga cash doles sa kapin 139,000 tricycle drivers sa 17 ka local government units sang National capital Region (NCR).
Samtang, ang mga tricycle drivers sa guwa sang Metro Manila, mga transport network vehicle service (TNVS) kag jeepney drivers ang makabaton sang P5,000 nga cash assistance sa mga masunod nga adlaw.
Ang Department of Transportation naman ang ginalauman nga magapagwa sang budget para sa fuel subsidy para sa transport sector sa ulihi nga semana subong nga bulan sang Marso.
Sa sector sang agrikultura kag pagpangisda, may yara sang igapanagtag nga P3,000 fuel subsidy para sa 26,000 ka mga mangunguma kag manugpangisda sa pungsod.
Luwas pa gid ang pagpanagtag sang P2,000 nga assistance gikan sa Presidential Assistance for farmers and Fisherfolk Program nga mahimo magamit nga dugang capital sa ila pangabuhian.
Nagpanawagan man si President Ferdinand Marcos Jr. sang kooperasyon sa tanan nga mga Filipino kag nagpasalig nga ululupod nga atubangon kag solusyunan ang krisis nga ginapangatubang sang pungsod.
