Gin-anunsyo ni President Ferdinand Marcos Jr, ang mas dako nga rollback ukon pagnubo sa presyo sang produktong petrolyo sa masunod nga semana.
Yari ang Big-time rollback sa presyo sang gatong;
Diesel- P24.94 kada litro
Gasolina- P3.41 sa kada litro,
Kerosene – P2.00 sa kada litro.
Ini nga pagnubo ang mas mataas sang sa nagligad nga rollback kag ginalauman nga makahatag sang ligwa sa publiko.
Ginhatagan pagtamod man sang Presidente nga dapat mabatyagan sang tagsa ka Pilipino ang tagsa ka sentimo sang pagnubo kag likawan ang hasol sa pagpila.
Kaangot sini, nagpanawagan ang Presidente sa mga kompaniya sang langis nga lubos kag wala sang atraso nga ipatuman ang rollback sa presyo sang langis, kaangay sang ginalauman nga daku nga pagnubo sa masunod nga semana.
Naghingyo man ang Presidente sa publiko nga i-report sa iya talatapan kag sa Department of Energy ang mga nagalapas sa nagaluntad nga presyo sang langis agud mahatagan nila sang aksyon.
Ginpahayag man sang Department of Energy nga possible may yara sang isa pa ka rollback.
Lauman nga ang opisyal nga pag-adjust sa presyo iga-anunsyo sa Lunes kag ipatuman naman ini sa Martes.
Samtang, gin-anunsyo man sang Presidente nga ginpalawig sang Land Transportation Office sa tatlo ka bulan ang validity sang mga lisensya kag registration nga natalana nga mag-expire subong nga Abril, nga wala sang penalidad, bangud sang krisis sa Middle East.
