Gin-appoint ni President Ferdinand ”Bongbong” Marcos Jr. si anay Philippine National Police chief Nicolas Torre III bilang bag-o nga general manager sang Metropolitan Manila Development Authority (MMDA).
Ini ang ginkumpirmar ni Palace Press Officer Undersecretary Atty. Claire Castro kahapon nga adlaw.
Si Torre ang magabulos kay Procopio Lipana bilang General Manager sang Metropolitan Manila Development Authority.
Samtang, wala pa sang sabat ang Presidential Communications Office (PCO) kun ngaa ginpahalin si Lipana sa iya pwesto, kag kon bala igasaylo sa iban nga posisyon ang nasambit nga opisyal.
Suno kay Interior Secretary Jonvic Remulla, mapilitan si Torre nga magretiro sang temprano sa pwersa sang kapulisan kun batunon sini ang posisyon sa MMDA.
Matandaan nga si Torre ang ginkakas bilang hepe sang PNP sang nagligad nga bulan sang Agosto nga suno kay Remulla ang isa sa mga rason sang iya kapaslawan sa pagsunod sa mandu sang National Police Commission (NAPOLCOM) angut sa pag-reassign sang pila ka mga opisyales sang PNP.
Apang, nagapabilin ang status ni Torre bilang 4- star General, nga mas mataas sang sa 3-star General ni Nartatez.
