Ginpaanggid ni President Ferdinand Marcos Jr. sa “kanser” ang lapnagon nga korapsyon sa gobyerno, nga suno sa iya masakit bulungon apang kinahanglan nga atubangon agud masalbar ang pungsod.
Suno sa Presidente, naga-agi subong ang Pilipinas sa mabudlay nga sitwasyon bangud sa mga gina-imbestigaran nga anomaliya, partikular sa mga flood control project halin 2022 tubtob 2025.
Ginsiling niya nga ang “major surgery” batuk sa korapsyon ang nagtuga sang paghinay sang paggasto sang publiko, pagtibusok sang stock market, kag pagluya sang piso, apang ginsigurado niya nga madasig nga makabangon ang pungsod.
Narekober na man sang gobyerno ang pila sa mga ginpahayag ill-gotten assets sang pila ka mga mamalidha kag kontraktor.
Ginpabakod man ni Marcos ang Independent Commission for Infrastructure (ICI) nga amo ang nagarekomenda sang pag-file sang kaso batuk sa mga naulamid, kalakip si anay Rep. Zaldy Co.
Hugot nga ginsiling sang Presidente nga padayunon ang kampanya kontra korapsyon apisar nga nagatuga ini sang kabudlay sa subong, apang suno sa iya mapinuslanon gid ang pag-antos para sa mangin resulta.
