Ginpamatud-an liwat ni President Ferdinand Marcos Jr ang pangako sang iya administrasyon nga mahatagan ang tagsa ka pamilya nga Pilipino sang isa ka luwas, disente, kag barato nga puluy-an.
Ang pahayag ginhimo sang Presidente kadungan sang pagbukas sang National Housing Expo 2025 nga ginhiwat sa World Trade Center, Pasay City, nga nagatuyo nga ipakita ang mga programa, serbisyo, kag inobasyon sa sektor sang pabalay.
Gintumod sang Presidente ang padayon nga pagtinguha sang gobyerno sa pagpasangkad sang mga programa sa pabalay, pagpasimple sang mga proseso, kag pagpadalum sang suporta para sa sektor. Ang expo magapakita man sang nagkalain-lain nga serbisyo pareho sang home design, planning, financial assistance, kag housing loan processing.
Ginhatagan man pagtamod ni Pangulong Marcos ang Green Lane Program, nga nagapasanyog sang pagtukod sang climate-resilient homes—mga balay nga sarang magdugay kag makapasibu sa nagabag-obag-o nga kondisyon sang panahon.
Gindayaw man sang Presidente ang Pag-IBIG Fund bilang isa sa pinakamasaligan kag malig-on nga kaupod sang gobyerno sa housing sector.
Dugang pa sang Presidente, ang Pag-IBIG nakahatag sang halos ₱75 billion nga cash loans, nga nakabulig sa ginabanta tatlo ka milyon ka mga miyembro nga masabat ang ila gilayon nga pinansyal nga kinahanglanon.
Sa idalom sini nga programa, ang mga mamumugon nga may manubo nga kita makakuha sang pautang sa pabalay sa interes nga tatlo ka porsyento (3%) kada tuig. Lakip man diri ang mga Overseas Filipino Workers (ofws) kag ang mga benepisyaryo sang Pantawid Pamilyang Pilipino Program (4Ps).
Bilang kabahin sang selebrasyon sang National Shelter Month, gin-anunsyo man sang Presidente ang pagpanagtag sang Notices of Approval kag Certificates of Entitlement sa mga benepisyaryo halin sa Los Baños, Laguna; Syudad sang Lucena; Syudad sang Iloilo; kag Caloocan City, nga magahatag sang alagyan para sa ila sa ulihi mangin tag-iya sang duta nga ila ginapuy-an.
