Gin-anunsyo ni President Ferdinand Marcos Jr., ang iya pagsalig nga ang ginpatuman nga ceasefire ang makabulig sa pagpasanyog sang supply sang langis kag ang kondisyon sang mga Filipino seafarers nga apektado sang tensyon sa Middle East.
Suno sa Presidente, kabahin sang ginkasugtan nga ceasefire amo ang liwat nga pagbukas sang Strait of Hormuz nga importante sa international oil trade.
Bangud sini, ginalauman nga makabalik na sa normal nga operasyon ang linibo ka mga seafarers nga na-stranded kag madugay nga naghulat nga makalabay ukon makahalin sa nasambit nga lugar.
Dugang pa niya nga ginalauman man nga magapadayon ang pagsulod sang mga supply nga naatrasar bangud sang krisis.
Ginpasalig man ni President Marcos nga gamiton sang gobyerno ang duha ka semana nga ceasefire agud mapadasig ang supply sang petrolyo sa Pilipinas kag maamligan ang kaluwasan kag kaayuhan sang mga seafarers.
Nagalaum man ang Presidente nga magapadayon ang cease-fire kun maayo ang negosasyon, bangud suno sa iya, luyag sang tanan nga bahin nga matapos na ang kinagamo.
Samtang, ginpahayag ni Marcos nga posible makaapekto ang ceasefire sa pagnubo sang presyo sang langis, apisar nga gin-ako sini nga posible indi bastante ang duha ka semana agud gilayon nga mabatyagan ini bangud sa dynamic nga sitwasyon sang merkado.
Apang kun magpadayon ang ceasefire kag mag-ayo ang sitwasyon, ginalauman nga maganubo man ang presyo sang petrolyo.
