Nagpanawagan si President Ferdinand Marcos Jr. sa tanan nga mga Filipino nga ipakita ang espiritu sang “bayanihan” sa tunga sang nagasaka nga presyo sang gatong tuga sang nagapadayon nga tensyon sa Middle East. Suno kay Marcos, ginahimo sang gobyerno ang nagkalain-lain nga tikang agud mapamag-an ang epekto sang pagsaka sang presyo sang petrolyo sa pumuluyo. Lakip diri ang paghatag sang mga fuel subsidies para sa mga sektor nga apektado kaangay sang transportasyon kag agrikultura. Suno pa sa iya, ang pagsaka sang plete sa subong ang indi sabat sa padayon nga pagsaka man sang presyo sang gatong rason nga temporaryo nga ginpaiway ang fare hike sa mga public utility vehicle. Ginpahayag man sini nga ginabantayan man ang supply sang gatong sa pungsod kag nagapangita sang iban nga masaligan nga supplier agud malikawan ang hinali nga pagkulang sang supply. Nahibaluan nga may ginalauman nga 300,000 ka bariles sang diesel nga maga-abot sa pungsod agud makabulig sa pagpahagan-hagan sang presyo sini. Dugang pa sang Presidente, importante ang pagbinuligay sang kada isa agud malampuwasan ang krisis kag maproteheran ang mga pumuluyo batok sa mas mataas nga presyo sang mga balaklon kag serbisyo.
