Ginpangunahan ni President Ferdinand R. Marcos Jr. ang pormal nga turnover sang 16 Mobile Soil Laboratory (MSL) units para sa kada rehiyon sang pungsod sa isa ka seremonya nga ginhiwat subong nga adlaw sa Science City of Muñoz, Nueva Ecija.
Ang MSL isa ka modern nga ten-wheeler truck nga may kumpleto nga kagamitan kag pasilidad nga sarang mag-analyze sang 44 nga chemical, physical, kag microbiological soil parameters, pati man sang chemical parameters sang tubig.
Tinutuyo sang amo nga mga laboratory nga mapaayo ang research kag paggamit sang lupa kag tubig para sa mas produktibo nga agrikultura.
Ang una nga yunit sang MSL ginlunsyar sadtong Disyembre 6, 2024, sa isa ka seremonya sa Malacañang, kag halin sadto na-deploy na sa mga probinsya sang Tarlac kag Nueva Ecija, kun sa diin naka-analyze ini sang halos 1,500 soil samples kabaylo sa masobra 300 ektarya sang ulumhan nga duta.
Ang 16 nga bago nga yunit ang ginbaton sang mga Regional Soil Laboratory Chiefs, nga amo ang magapanguna sa adlaw-adlaw nga operasyon sang mga MSL sandig sa mga pagsulundan sang Bureau of Soils and Water Management (BSWM).
Matapos ang turnover ceremony, nakigsapol si President Marcos sa mga national grand winners sang ika-50 Gawad Saka: Parangal sa mga Natatanging Magsasaka at Mangingisda. Gindayaw sang Presidente ang ila nga dedikasyon kag importante nga kontribusyon sa sektor sang agrikultura kag pagpangisda nga suno sa iya padayon nga nagapapag-on sa seguridad sa pagkaon kag pagsanyog sang pungsod.
Sa nasambit nga forum, ginsabat man ni President Marcos ang pila ka pamangkot sang mga Gawad Saka awardees kag ginsiguro nga padayon nga ginapaayo sang gobyerno ang mga sistema kag serbisyo agud ma-address ang ila kinahanglanon, ilabi na sa panahon sang mga kalamidad.
Ang mga aktibidad subong nga adlaw kabahin sang selebrasyon sang 127th anniversary sang Department of Agriculture kag 74th anniversary sang BSWM.
