Gin-engganyo ni President Ferdinand Marcos Jr. ang publiko nga maggamit sang electric tricycle ukon e-trikes agud makabulig sa pagtipid sang gatong kag pagdugang sang kita sang mga driver.
Ini ang ginpahayag sang Presidente sa iya pagbisita sa manufacturing kag assembly plant sang electric vehicles sa Biñan, Laguna.
Suno kay Marcos, ang isa ka e-trike ang makabyahe sang 100 tubtub 210 kilometers sa isa lang ka charge, samtang ang full charging naman ang nagalawig sang anum tubtub walo ka oras.
Ang pamuhunan sa industriya sang e-trike ginalauman man nga makatuga sang mga trabaho kag makahatag sang mga oportunidad sa mga lokal nga negosyante nga nagahimo sang mga piyesa.
Tinutuyo sang gobyerno nga himuon nga de-koryente ang 50% sang mga salakyan sang pungsod sa tuig 2040 agud mabuhinan ang pagsalig sa imported nga gatong kag mapasanyog ang mas matinlo nga transportasyon.
