Ginpangunahan ni President Ferdinand R. Marcos Jr. ang pagbukas sang klase sa Epifanio Delos Santos Elementary School (EDSES) sa Malate, Manila.
Ini ang kabahin sang promisa sang Administrasyon nga siguruhon ang isa ka luwas kag maayo nga pagsugod sang School Year sa mga pampubliko nga eskwelahan sa bug-os nga pungsod.
Nahibaluan nga nagbalik na sa tradisyunal nga iskedyul sang School Year halin Hunyo tubtob Marso, matapos ang temporaryo nga pagbag-o sang tion sang pandemya sang COVID-19. Ginalauman nga magatakop ang School Year 2025-2026 sa Marso 31, 2026.
Ginpangunahan ni President Marcos ang interactive learning session kaupod ang estudyante sang Grade 1, kun sa diin ila gingamit ang mga flashcard para sa pagbasa kag aktibo nga partisipasyon.
Ginhatagan man kahigayunan sang Presidente nga sabton ang mga palamangkutanon sang mga estudyante, nga nangin isa ka masadya kag inklusibo nga classroom environment.
Matapos ang aktibidad sa klase, nagbisita si President Marcos sa iban pa nga mga hulot-klasehan sang Grade 1 kag nagpadayon sa opisina sang Principal, kun sa diin ginpalab-ot niya ang angut sa mga plano sa seguridad sang eskwelahan, kalakip na ang paggamit sang CCTV monitoring system.
Una na nga gin-anunsyo sang Department of Education (DepEd) nga ginabanta magalab-ot sa 27 milyones ka mga estudyante halin sa preschool tubtob senior high school ang ginalauman nga magaparehistro para sa SY 2025–2026.
Sa pagbuylog sang Presidente sa pagbukas sang klase, liwat sini nga ginpakita ang paghatag bili sang gobyerno sa edukasyon kag kaluwasan sang mga estudyante sa pungsod.
