Gin-anunsyo ni President Ferdinand “Bongbong” Marcos Jr. nga magahatag ang gobyerno sa mga bus operators sang P10,000 nga fuel subsidy kada bus unit agud makabulig sa pagpahagan-hagan sang epekto sang mahal nga presyo sang gatong.
Ginasiguro ni Marcos nga indi lang ang mga bus operator sa Metro Manila ang mahatagan sang subsidy kundi sa bilog nga pungsod.
Suno sa Presidente, ang P10,000 nga fuel subsidy ang ihatag pinaagi sa digital wallet, ATM, check ukon cash.
Nagpanawagan man si Marcos sa bus operators sang ila suporta kag kooperasyon agud mahagan-hagan ang agunto sang mga pasahero.
Nagahingyo ang Presidente sa mga bus operators nga idangop sa otoridad kun may yara sang problema ukon suhestyon agud ma-improve ang sistema kag mangin convenient para sa ila kag sa riding public.
