Nagpromisa si President Ferdinand “Bongbong” Marcos Jr. nga padayon ang iya nga administrasyon sa paghatag sang bastante nga training kag kagamitan sa Philippine Air Force (PAF) agud matungdan sang maayo ang ila mga duties.
Suno kay Marcos nga padayon nga nagasanyog ang Air Force, kadungan sa pag-welcome sang anom ka bag-o nga eroplano nga nagapasangkad sang mga skills pinaagi sa flight simulation kag advanced training.
Dugang pa sang Presidente nga nakumpleto man sang Philippine Air Force ang madamo nga proyekto sa imprastruktura kag ginasiguro nga ang mga air assets ang protektado kag strategically nga nakaposisyon.
Gindayaw ni Marcos ang mga tinawo sang Philippine Air Force nga padayon nga naga-response kag nagaalagad sa panahon sang mga kalamidad.
Na-record sang Philippine Air Force ang 1,034 nga oras sang paglupad para sa mga air kag maritime patrols sa West Philippine Sea, Philippine Rise, kag iban pa nga importante nga mga chokepoint.
Nagpatigayon man ini sang 95 maritime patrol flights, kun sa diin na-track ang 11,905 nga foreign vessels.
Ginasaulog subong sang Philippine Air Force ang ika-78 anibersaryo sini kun sa diin nag-angkon sang mga aktibidad kasubong sang mga exhibits sa mall, medical kag dental outreach sa mga komunidad sa baybayon, youth leadership summits, kag isa ka painting contest.
Ang tema sang anibersaryo, “Focus PAF @ 78: Advancing Air Power by Committing to Mission, Strengthening Capabilities and Championing Core Values,” nga long-term direction sang serbisyo.
