Pagasabton ni President Roxas, Capiz Mayor Receleste Escolin ang kaso nga usurpation of official functions nga ginpasaka batok sa iya ni Former Vice Mayor Alfonso Golero.
Ang usurpation of official functions sa idalom sang Article 177 sang Revised Penal Code amo ang ilegal nga pag-angkon ukon paghimo sang katungdanan sang isa ka opisyal sang gobyerno nga wala sang nagakaigo nga legal nga awtoridad.
Sa interview sang Bombo Radyo kay Mayor Escolin, iya ginpahayag nga maga-atubang siya sa Provincial Prosecutor’s Office kag pagasabton ang amo nga reklamo.
Suno pa sa alkalde, indi siya magpapaapekto sa kaso bangud padayon siya nga nagaserbisyo sa banwa kag nagasalig ini sa suporta sang mga pumuluyo nga nagbutang sa iya sa pwesto.
Dugang pa sang natungdan, ginapanindugan niya ang kinamatarong sang kada isa nga magpasaka sang kaso kag ginpahayag ang ila panindugan paagi sa legal nga proseso.
Samtang bukas naman ang talatapan sang Bombo Radyo sa pagpaathag ni Former Vice Mayor Alfonso Golero sa amo nga issue.
