PRESIDENT ROXAS, CAPIZ- Pormal na nga nag-file sang motion for reconsideration si Mayor Receleste Escolin sa Comelec En Banc matapos nga ginkanselarar sang First Division sang Comelec ang iya nga Certificate of Candidacy (COC) kaangot sang ginpahayag paglapas sa three-term limit rule.
Sa interview sang Bombo Radyo Roxas, ginsiling ni Escolin nga kumpiyansa man siya sa gihapon nga makuha ang hustisya bangud mismo si Comelec Chairman George Garcia suno sa iya ang nagsiling nga “hindi lahat ng desisyon ng First Division ay pinapanatili ng En Banc.”
Suno sa iya, padayon niya nga ipakigbato ang iya nga panindugan batok sa disqualification case nga gin-file kontra sa iya, kag preparado siya nga magpalab-ot tubtob sa Korte Suprema kun indi pagpaboran sang Comelec En Banc ang ila gin-file nga apela.
Madumduman nga ginkanselar sang Comelec First Division ang iya nga Certificate of Candidacy (COC) matapos nga ginpaboran ang petisyon nanday Richard Baltar kag Arnulfo Degala, nga pilit ginapahayag nga naglapas suno siya sa three-term limit rule. Base sa desisyon, indi suno diri bastante ang tatlo ka bulan nga suspension ni Escolin nagikan sa Ombudsman agud makabig nga interrupted ang iya nga termino.
Nasuspinde si Escolin sang Pebrero 2025 bangud sa kaso nga simple misconduct apang liwat nga nagpapili sa eleksyon kag ginproklamar nga tagdaog bilang alkalde sang Mayo 13, 2025.
Suno sa alkalde, malinaw para sa iya nga indi dalayon ang iya nga termino bangud temporaryo ini sya nga ginpapanaog sa pwesto, rason nga indi siya dapat madiskwalipikado.
Ginsiguro man ni Escolin nga magapadayon ang serbisyo sang iya nga administrasyon para sa mga taga-President Roxas samtang gina-hearing pa ang iya nga kaso sa En Banc.
Interviewed by Bombo Francis Biñas
