ROXAS CITY – Wala sang kahilabtanan ang lokal nga gobyerno sang banwa sang President Roxas sa pagtumod sang mga benepisyaryo nga ginhatagan sang bulig-pinansiyal sang isa ka Chinese private organization nga mga nahalitan sang bagyo nga Ursula.
Ini ang ginpanindugan ni Mayor Receliste ‘Tanoy’ Escolin sang mainterview sang Bombo Radyo.
Suno kay Escolin nga sang nag-abot ang Chuchi Foundation sa nasambit nga banwa, may ginauyatan na ang mga ini nga stubs nga may nakabutang nga makabaton ang isa ka benepisyaryo sang P10, 000, P15, 000 kag P20, 000.
Ginpahayag ni Escolin nga wala naman na validate sang lokal nga gobyerno sang banwa ang listahan sang mga benepisyaryo sang bulig-pinansiyal gikan sa grupo.
Ginpanindugan ni Escolin nga indi dapat pagbasulon ang iya administrasyon bangud wala sila nagtugda sa paghatag sang bulig sang pribado nga grupo.
Apang tuman ang pagpasalamat sang alkalde bangud padayon nga nagaalabutan ang bulig para sa mga pumuluyo nga nahalitan sang nasambit nga bagyo sa amo nga banwa.
Base sa pagpangusisa sang alkalde nagalab-ot tanan sa 1000 ka mga pumuluyo ang nakabaton sang bulig-pinansiyal gikan sa nasambit nga grupo kun sa diin kapin 400 ka pamilya ang nakabaton sang tag-P10, 000, kapin sa 300 ka pamilya ang nakabaton sang tag-P15, 000 kag kapin 300 naman ka pamilya ang nakabaton sang tag-P20, 000.
