PRESIDENT ROXAS, CAPIZ – Gintuad ni President Roxas Mayor Receliste Escolin nga may nabaton ini nga pagpamahog sa iya kabuhi.
Sa interview sang Bombo Radyo kay Mayor Escolin nga base sa nabaton sini nga impormasyon nagikan sa mga otoridad kag pila ka tawo, duha ka grupo ang nagatuyo sa karon sa iya kabuhi kag naglab-ot sa P3 million ang offer para lamang nga ipapatay siya.
Suno kay Escolin nga taga probinsya sang Capiz ang may luyag nga ipatumba siya apang taga Iloilo ang ila ginapatrabaho kabaylo sa tres milyones pesos.
Pulitika kag negosyo ang ginalantaw sini nga rason sa death threat nga iya nabaton.
Dugang pa sini nga sumugod sang 2015 kag ginsundan sang 2019 ang mga nauna na nga pagpamahog sa iya kabuhi kag nagapati ini nga sa karon hilway naman kag yara lang sa palibot ang mga persona nga nagatuyo sang iya kabuhi.
Pahayag pa ni Escolin nga indi niya himu-himo lang ukon drama ang iya mga ginatuad bangud nagikan mismo sa mga otoridad ang impormasyon kag ang rason kun ngaa iya ini ginabuyagyag agud mahibaluan sang tanan kag mangin vigilante ang mga pumuluyo.
Aminado si Escolin nga nagakabalaka kag nahadlok man ini sa mga pamahog nga iya nabaton apang apisar may death threat padayon ini nga magaserbisyo bangud madamo pa ini sang gusto ubrahon sa banwa sang President Roxas.
Suno pa kay Escolin nga napahibalo niya na ini sa mga kapulisan kag ginahinyo sini kun tani sa PNP nga magbutang sang blocking force sa upland barangay ilabi na nga may nabaton man ini nga report sang damlag lang nga may makaduluda nga L300 van sa kakampuhan sa dis oras sang gab-i kag ginapahayag may lima ka tawo sa amu nga lugar.
Panawagan naman sini sa mga pumuluyo kun may nakita nga naka-helmet kag wala plaka nga motor ukon makaduluda nga salakyan kag tawo nga nagalibot-libot mag-report gilayon sa mga otoridad.
