ROXAS CITY – Temporaryo nga ginpaiway ang opisina kag ginpasaraduhan ang municipal hall sang banwa sang President Roxas, Capiz.
Ini ang ginpahayag ni Mayor Receliste ‘Tanoy’ Escolin sang mainterview sang Bombo Radyo.
Ini ang kasunod sang pagka-expose sang pila ka mga empleyado kay Capiz governor Esteban Evan ‘Nonoy’ Contreras nga nag-positibo sa coronavirus disease (COVID-19).
Suno kay Escolin nga, igapaidalom sa disinfection ang bilog nga municipal hall.
Ginpahayag sini nga kalakip sa naka-close contact sa gobernador ang mga staff sang Office of the Vice Mayor, pila ka mga Sangguniang Bayan (SB) members kag mga barangay kapitan sang banwa.
Sila ang nagtambong sa kaadlawan sang isa ka empleyado sang gobernador sa Barangay Casanayan, Pilar kun sa diin nangin bisita man si Contreras.
Isa lamang ka adlaw suno kay Escolin nga ginpaiway ang opisina kag magabalik man ini bwas nga adlaw sang Miyerkules, Agosto 26.
Gilayon man nga ginmanduan ang tanan nga nakahalubilo sang gobernador nga magpaidalom sa strict-home quarantine samtang ginahulat ang pagpaidalom sa ila sa nagakaigo nga tests.
Base naman sa inisyal nga pagpangusisa sang alkalde, wala pa man sang may nagalain ang pamatyag sa nasambit nga mga empleyado nga nakasalamuha sang gobernador.
