ROXAS CITY -Ginkumpirma sang nagatindog nga presidente sang Alliance of Roxas City Tricycle Operators and Drivers Association (ARCTODA) ang pagtake-oath sini bilang pinuno sang asosasyon sang mga tricycle operators kag drivers sang Septiembre 26, 2019 sa atubang ni Mayor Ronnie Dadivas.
Suno kay Leonardo Bade nagkasugot ang kapin sa 30 ka mga TODA president sa magkatuhay nga kabaranggayan sa Roxas City sa ginpatigayon nga sinapol nga siya ang magatindog nga presidente sang ARCTODA, ang bag-o nga TODA sa syudad sang Roxas.
Ginpahayag pa sini nga accredited ang ARCTODA sang gobyerno sang syudad sa diin isa ang alkalde sa mga nagduso nga magtukod sang grupo nga magaserbe nga asosasyon sang mga tricycle operators kag drivers.
Suno kay Bade nga handum sini sa iya nga pagdumala makaangkon sang libre nga sertipikasyon ang mga miyembro sang asosasyon kag magamit sa ensakto ang pondo sa diin makabenepisyo indi lamang ang mga opisyal kundi mangin ang mga miyembro.
Handa man si Bade nga akomodahon ang luyag mangin miyembro sang ARCTODA nga gikan sa Roxas City Tricycle Operators and Driver’s Association ukon RCTODA ,apang ginklaro nga indi sila mahimo mangin TODA officers kundi miyembro lamang.
Ginklaro man sini nga indi sila magbaton sang mga colorum nga tricycle bilang miyembro sang ila asosasyon, bangud ang pwede lamang mangin miyembro sang ARCTODA ang mga legitimate franchise holders.
