ROXAS CITY Ginapetisyunan sang pila ka mga miyembro sang San Esteban Farmers Association (SEFA) sa Esteban Pilar si Mr. Reynaldo Vega nagapungko bilang presidente sang nasambit nga asosasyon.
Sa interview sang Bombo Radyo kay Ronald Arguelles Vice President kag Ernisa Borado Secretary sang SEFA, ginpahayag sang mga ini nga nagkasugot sila kaupod ang pila ka mga miyembro sang ila asosasyon nga petisyunan na lamang ini agud mapahalin sa pwesto.
Mahibaluan nga masobra 3 na ka tuig ang ila grupo kag may yara sang 101 ka mga miyembro kung sa diin aktibo nga nagapartisipar sa ila lugar.
Pila sa mga rason nga ila ginareklamo ang pagpasilabot ni Vega sa ila commodity store nga kung sa diin indi na ini sakop sang iya responsibilidad bangud may yara na ini nga Project Manager, Cashier kag Labor nga nagapamuno.
Ang nasambit nga commodity store ang nagikan sa Department of Labor and Employment (DOLE) nga gintan-ay sa tagsa ka mga lugar agud makabulig sa isa ka asosasyon subong man sa mga pumuluyo.
Kaungdan sini ang P800,000.00 nga balor sang mga nagkalain-lain nga mga baligya.
Ginpahayag man nanday Arguelles kag Borado nga sang una wala nila ini ginapautang sa mga pumuluyo apisar sa mga miyembro sini apang sang nahibaluan nga una na nga nag-utang sang produkto kag kwarta si Vega, madamo na nga mga miyembro ang nagpalapit sa ila kag naghinyo nga mag-utang.
Wala man suno diri sang problema sa una bangud kada semana, nagabayad man ang mga miyembro sang ila utang kag sa pagkamatuod suno diri sa sulod lamang sang 11 ka semana nakakuha sila sang kita nga masobra P800,000.00.
Apang sang nagadugay na didto na kag naga-amat-amat nga nagadula kag nagagamay ang ila income rason sang ila pagkatingala.
Una na diri ang pagkadula sang kapin P15,000.00 nga kwarta nga yara sa ila Treasurer kag ang P28,100.00 nga ginhatag man sini sa ila Presidente.
Sa kabug-usan yara sa P116,000.00 ang tanan nga ila napautang rason nga nagpatigayon sila sang assembly meeting sadtong Domingo agud hinalaan ang pila ka mga reklamo sang miyembro.
Sa nasambit nga paghinun-anun 43 lamang ang nagtambong.
Angut sini, nagsuhestyon si Vega nga temporaryo na lamang nga ipasara ang amu nga balaligyaan kag sukton ang mga utang, apang indi ini maayo nga tikang para nanday Aeguelles kag Borado bangud para sa ila paano pa nila masukot ang may mga utang kun sarado na ini.
Sa karun, padayon pa ang ila pagpanikasog sang pila ka mga dokumento kag paghibalo kung anu ang ila maayo nga mahimo angut sa nasambit nga isyu.
–
