Roxas City – Pabor ang presidente sang fish vendors association sa nangin tikang sang Roxas City Environmental Sanitation Enforcement Team (RESET) angut sa pagkumpiskar sang pila ka mga depektibo nga kilohan sa Teodoro Arcenas Trade Center (TATC).
Kasunod ini sa ginpatigayon nga inspeksyon sang RESET sa mga negosyante nga nagabaligya sa nasambit nga merkado sa diin nakumpiskar ang 55 ka mga depektibo nga kilohan.
Suno kay Marissa Batan nagakadapat lamang ini nga tikang agud malikawan ang pagdinaya kag pagtinunto sa mga kunsomidor.
Ginpahayag ni Batan nga indi lamang mga bumalakal ang apektado kundi sila man mismo nga mga negosyante.
Aminado naman ang negosyante nga indi malikawan nga may pila ka mga bumalakal nga naga-usisa sa mga negosyante.
Apang, gin-athag sini nga indi tanan nga mga negosyante ang nagadinaya.
Dugang pa sini nga halos 100 sila tanan ka mga miyembro sang mga negosyante ang nagabaligya sa sulod sang merkado sa diin sa tagsa ka mga vendor ang may pamaagi agud madamo ang magbakal sang ila nga baligya.
