Patay ang duha ka security guard kag tatlo ka iban pa matapos gin-atake sang mga rebelde nga Houthi sang lima ka missiles ang presidential palace complex sa southern city sang Aden sa Yemen.
Suno kay Information Minister Moammar al-Eryani, ang prime minister kag mga katapo sang gabinete sang Yemeni nga yara subong sa sulod sang palasyo sang presidente sang Maashiq ang luwas kag wala man maano.
Suno sa spokesperson sang Houthi military nga si Yahya Saree, ang insidente kabahin sang ila pormal nga polisa nga hungod nga puntiryahon ang mga Saudi military build-ups.
Dugang pa nga ila man ginbomba ang headquarters sang military operations sang mga opisyal sang Saudi Arabia upod lakip na ang mga taguan sang mga armas sa sulod sang complex.
Pila ka mga testigo ang nakabati sang mabaskog nga paglupok sa palibot sang palasyo samtang padayon nga ginabantayan sang mga otoridad ang seguridad sa bug-os nga rehiyon kasunod sang pag-atake.
