ROXAS CITY – Dakup sa akto nga nagagamit sang ginapatihan iligal nga droga ang 32-anyos nga preso sa sulod sang iya selda sa Capiz Rehabilitation Center (CRC).
Ginkilala ang preso nga si alyas ‘Atong’ residente sang banwa sang Ivisan apang nadakpan sa banwa sang Pontevedra bangud sa kaso nga paglapas sa iligal nga droga sang tuig 2019.
Sa interview sang Bombo Radyo kay Mr. Arjuna Yngcong, Provincial Jail Warden sang CRC, nakit-an sang kaupod nga preso nga amu nagaserbi bilang mayor sa selda si alyas ‘Atong’ nga nagagamit sang ginapatihan iligal nga droga takna 1:00 sang maga-aga.
Gilayon nga ginhabilo sang mayor ang guwardiya kag natigayon nga makumpiskar ang 10 ka sachet sang ginapatihan iligal nga droga.
Pahayag ni Yngcong, nakasiling ang amu nga preso nga nakuha sini ang iligal nga droga sang nagtambong ini sa hearing.
Bangud sini, ginahulat ni Yngcong ang eksplenasyon sang mga guwardiya nga kaupod ni ‘Atong’ sang hearing.
Sa karon, natalana nga iga-paidalum sa drug test si ‘Atong’ samtang ginatun-an pa sang legal counsel ang pagpasaka sang nagakaigo nga kaso.
Matandaan sang nanliligad nga bulan tatlo man ka mga priso ang nagpositibo sa drugtest matapos makit-an ang mga iligal nga droga sa banyo sang selda.
